皇家马德里西班牙中场艾斯高，近年喺「银河舰队」上阵机会唔多，已逐渐成为球队边缘人。为咗争取上阵机会，据报艾斯高已经同贝迪斯达成协议，将会喺今夏以自由身加盟，同智利教头比历坚尼再次合作。

据西班牙《阿斯报》爆料，艾斯高同贝迪斯将会签约2年，其後可选择再续约1年，合约年薪将高达1000万欧元，意味艾斯高届时将成为贝迪斯阵中年薪最高嘅球员。现年30岁的艾斯高，近年喺皇马出场机会偏少，今季联赛只上阵12次，令其萌生去意。

艾斯高同现时贝迪斯主帅比历坚尼，过往曾喺马拉加一齐共事，今次转会如果事成，两人有望再续前缘。啱啱捧起西班牙盃嘅贝迪斯，联赛高踞前列，好大机会锁定来季欧战资格，除咗艾斯高之外，球队已经倾掂拉素守将雷斯菲腊比同富明尼斯攻击手雷斯轩历基，足见贝迪斯争取佳绩嘅野心。