巴塞隆拿正物色前锋，不过心仪目标艾宁夏兰特同罗拔利云度夫斯基都好难斟，前者机会不大，「罗拔佬」亦好大机会被拜仁强留多一年至约满，令巴塞近期被逼启动「C计划」，就系斟介卢卡古。

虽然「渣古」今季喺英超表现令人失望，但巴塞睇中佢喺意甲时期嘅演出，为国际米兰上阵95场入64球，认为佢嚟到西甲应该帮到手，西班牙传媒报道，巴塞高层近日与卢卡古经理人接触，初步了解双方意向。

卢卡古表现低迷，佢不止一次透露希望离开英超，首选系重返国米，但如果巴塞想搵佢，相信佢都唔会拒绝，不过问题系车路士今季花费1.15亿欧元巨资签佢，加上车路士主权变动，一切要等新管理层决定。

巴塞已有两手准备，假如未能以相宜价钱收购，仍希望向车路士借用「渣古」。