利物浦喺欧联4强次回合作客上半场落後2球，几乎阴沟里翻船，但最终有惊无险，反胜维拉利尔，打入决赛。赛事转捩点系「红军」主帅高普果断下半场一开波，就换入路尔斯戴亚斯搏杀，呢位哥伦比亚翼锋不负所托，进攻上发挥重要作用，包括顶入扳平1球，赛後当选为今场最佳球员。

路尔斯戴亚斯虽然只系踢咗下半场45分钟，但都有36次触球，20次传波有18次畀到队友，并有4次射门，入咗1球，并且4次成功扭过对手，5次同对手喺地面对抗，有4次胜出，表现非常抢眼。

欧洲足协技术观察团指路尔斯戴亚斯对改变战局产生重大影响，比赛期间不断创造威胁，所以将今场最佳球员殊荣颁畀佢。

25岁嘅路尔戴亚斯今年1月尾由波图转投利物浦，尝到职业生涯首次晋身欧联决赛滋味，赛後不禁激动流下英雄泪。