利物浦球星穆罕默德沙拿凭住喺今季嘅出色表现，周四（5日）荣膺2021/22年度FWA英格兰足球先生，佢受访时更豪言，「红军」今季将力争赢埋联赛、欧联同英足盃冠军，誓言要做「4冠王」！

沙拿今季为「红军」上阵45场攻入30球、交出14次助攻，除咗帮球队赢咗英联盃冠军之外，目前仲有机会角逐埋联赛、欧联同英足盃冠军。经过英格兰足球记者协会嘅评审後，佢周四（5日）顺利当选成为今届FWA英格兰足球先生，并从利物浦名宿鲁殊手上接过奖座，继2017/18年度後再次夺得呢项殊荣。

分享获奖感受时，沙拿表明希望继续努力，帮球队争做「4冠王」：「虽然唔系所有决定权都喺自己手中，但嚟紧仲有4场联赛，我哋一定要完成埋佢，然後睇吓结果系点。」佢强调，自上场反胜维拉利尔後，球队嘅争胜心非常强烈，而且要继续保持呢份决心，踢埋余下落嚟嘅比赛。此外，利物浦继於28日深夜同皇马争欧联冠军，沙拿亦形容呢场波系一项「复仇的任务」：「十分期待呢场波，好肯定将会系一场硬仗，2018年决赛我哋输畀佢哋系失望嘅一日，所以今次绝对系复仇嘅时机。」

至於效力车路士女子队嘅Sam Kerr则获选为今届英格兰足球小组，佢今季为「车仔」射入18球，带领球队目前高踞榜首，极有机会赢得女子英超冠军。