自今年2月「俄乌战事」爆发後，一直未有比赛嘅乌克兰国家队周四(12日)凌晨再踏球场，佢哋作客德甲嘅慕逊加柏赢2比1，为下月进行嘅世盃外附加赛作出备战。

今场热身赛有超过2万球迷入场，所有门票收益都会捐畀帮助乌克兰嘅慈善组织，慕逊加柏亦提供酒店同训练设施畀乌克兰备战。乌克兰今仗9分钟由表现活跃嘅梅迪克入波领先，慕逊加柏14分钟即由干拿诺斯追平，乌克兰完场前8分钟由碧夏利安诺克攻入致胜球赢2比1。

双方球员今场赛前都着起「反战」T恤入场，现场亦有「停止战争」嘅巨型横额，乌克兰领队柏度哥夫表示：「当国歌奏起我几乎忍唔住喊，好多谢远道嚟支持我哋嘅乌克兰人，亦好多谢德国人。」乌克兰会喺6月2日世盃外附加赛对苏格兰，胜方会再对威尔斯争夺世盃决赛周资格。