拜仁慕尼黑前锋罗拔利云度夫斯基去留问题一直众说纷纭，球会体育总监沙历咸美斯首次承认，呢位33岁波兰国脚拒绝续约，意味会方好可能提早今夏出售佢，以免人财两失。

沙历咸美斯被传媒问到「罗拔佬」续约问题时，透露对方无意留队：「我同罗拔利云度夫斯基倾过，佢明确表示唔接受会方提出嘅续约条件，同埋想离开拜仁，接受新挑战。」

罗拔利云度夫斯基将於明年6月尾约满，盛传西甲劲旅巴塞隆拿计划以3,000万欧元收购佢，甚至有传双方已经达成口头协议，将会签约3年。不过，沙历咸美斯表示，巴塞隆拿仲未向拜仁提出收购报价。

另外，已提早夺得今季德甲冠军嘅拜仁慕尼黑喺周六(14日)晚煞科战，领先2球优势下，作客被禾夫斯堡逼和2比2，罗拔利云度夫斯基顶入1球，以35个入球成为今季德甲神射手。