利物浦喺英足盃决赛勇夺今季第2个冠军，不过亦为英超同欧联争逐埋下隐忧，2大攻守主力穆罕默德沙拿同华基尔云迪积克(VVD)，喺今场决赛先後受伤提早退下火线，最後2轮联赛未必能够赶及上阵，不过高普证实2人伤势并唔算严重，如无意外可以喺欧联决赛复出。

埃及前锋穆罕默德沙拿今场只系踢咗33分钟，就因为鼠蹊部伤患离场，由迪亚高祖达入替，而荷兰中坚VVD亦喺90分钟法定时间完结前「顶唔住」，改由祖尔麦迪比上阵。2大主将喺一场关键决赛伤出，令球迷非常担心。

不过，利物浦领队高普赛後透露：「我当然有同佢哋倾过，佢哋睇落都OK，以我所知唔系咩严重伤患，不过下场比赛喺星期三(18日)凌晨，要佢哋复出系太赶。」高普透露「希望」2位主力可以喺英超煞科前复出，而球迷最关心系5月29日上演嘅欧联决赛，沙拿赛後被记者问到会唔会赶得切复出，佢就回应：「当然可以！」