曼城夺冠有唔少感人场面，其中辛真高捧盃流下男身泪一幕，令人动容，呢位乌克兰国脚嘅国家及家人仍然身陷战火，赛後佢披上乌克兰国旗，举起英超奖盃，以痛哭来宣泄情绪。

25岁嘅辛真高今仗下半场入替费兰甸奴，交出助攻予洛迪卡斯简迪扳平，协助球队落後下反胜维拉，完场後哭成泪人，颁奖前为奖盃披上乌克兰国旗，将胜利献给苦难中嘅同胞。

国家饱历战火，辛真高表示感谢曼城喺呢段困难时间，对佢同家人嘅支持：「喺最初嗰阵，我冇谂过足球嘅事，因为国家面临生死存亡，但喺呢段时间我得到好多支持，大家对我嘅心意已经代表一切。我愿意为佢哋奉献生命，因为佢哋为我做嘅一切，我好欣赏，亦永世难忘。」

辛真高表示，如果可以嘅话，想将英超奖盃带返乌克兰：「我为乌克兰人民感到自豪，希望可以将锦标带回国，献畀所有乌克兰人民，佢哋应得嘅。」