周六下午日职上演前列大战，「1哥」横滨水手主场迎战第4位嘅柏雷素尔，两支球队依家只系相差4分，今次交锋势必斗得激烈。横滨水手实力强横，喺主场出击更加系信心保证，近7仗联赛主场豪取6胜1和佳绩，今仗地头出击必定全力抢3分，主胜值得睇好。

（有线662及602台周六下午3时直播）

横滨水手上轮2比1作客反胜大阪飞脚，喺联赛录得3连胜，球员喺连场胜仗中累积信心，巴西前锋里奥施亚拉同西村拓真近期状态大勇，入波能力唔使担心，即使仍有宫市亮等伤兵，亦无损球队战斗力。横滨水手喺主场出战成绩极佳，今季联赛主场仍未逢1败，有望藉地利直接击倒争标对手，一吐周中日皇盃作客不敌枥木SC嘅乌气。

柏雷素尔近期气势强劲，连埋周中日皇盃赢德岛漩涡在内已经5连胜，不过当中有4场胜仗都系喺主场出击，而佢哋今季作客表现就相当飘忽，仍未试过喺联赛作客连胜，而且前锋戴恩费斯杜格拉斯同小将前锋细谷真大亦上阵成疑，面对主场霸气十足嘅横滨水手将会处下风，主胜值得捧场。