波兰世界足球先生罗拔利云度夫斯基向拜仁慕尼黑队友告别後，周一(18日)飞抵美国迈亚密，向新东家巴塞隆拿报到，将会参加巴塞季前集训，巴塞将为佢举行欢迎仪式。

签入罗拔佬可谓巴塞今季重量级收购，转会费5000万欧元，巴塞官方twitter全程直击呢位波兰射手飞抵美国过程，罗拔佬对住镜头说：「我很高兴加入巴塞，Forza Barca」

罗拔佬抵埗後接受巴塞官网访问，佢话：「我终於加盟巴塞，期待能享受喺巴塞嘅时光，过去几日过得有啲漫长，不过好在最後都能成事，亦正式开启我足球同人生新篇章。」

佢仲话一直想去西甲发展：「我将面对新挑战，我一直想到西甲，依家嚟到巴塞，跟住要考虑下一步，希望我同巴塞互相成就，尽可能赢更多冠军。我已经同沙维倾过，巴塞喺佢执教下令人期待，佢系球员时代好出色，亦深明执教之道，希望同佢创造美好未来。」

有分析指，罗拔佬於去年金球奖落败一刻，已决心离开拜仁，因为佢觉得德甲喺欧洲影响力不如其他联赛，加上拜仁对佢续约冷处理，令佢决心求去，指示经理人同巴塞接触，最终达到目的。