德甲劲旅多蒙特季前集训传出噩耗，今夏重磅收购前锋施巴斯坦贺拿，周一(18日)被发现睾丸出现肿瘤，多间媒体指佢患上睾丸癌。多蒙特发声明证实施巴斯坦贺拿已即时离开球队喺瑞士嘅集训营，未来一段时间会进行治疗，多蒙特周二(19日)凌晨热身赛就以1比3不敌华伦西亚。

多蒙特官方声明表示：「贺拿喺星期一朝早嘅训练後表示不适，立即进行全面检查，结果发现佢睾丸位置有肿瘤，未来几日会再行详细检查，为保护球员同佢屋企人嘅私隐，我哋唔会接受任何提问，有新消息球会会喺球员同意之下向大家交代。」据《每日邮报》、《GOAL》等媒体报道，贺拿今次系患睾丸癌。

原本周二对华伦西亚首演嘅贺拿，已经离开集训营，总监基尔表示：「呢个消息对贺拿同我哋都好震惊，球会上下祝福佢尽快康复，可以同我哋再次拥抱，我哋会确保佢得到最好嘅治疗。」28岁嘅贺拿系科特迪瓦国脚，之前踢过法兰克福、韦斯咸等球会，上季为阿积士踢欧联劲入11球，多蒙特今个月初以3,100万欧元购入，并视佢为艾宁夏兰特嘅继任人。

足球坛近年有唔少「抗癌战士」，阿根廷球星约拿斯古迪利斯、西班牙门将摩连拿、保加利亚前锋彭尼夫等球星都曾经验出睾丸癌，全部都可以成功重返球场比赛；前巴塞隆拿球星艾比度喺2011年证实肝癌，之後进行肝脏移植後亦继续比赛；荷兰领队尹戈尔今年初承认患前列腺癌，并接受25次化疗，但坚持带队出战年底世界盃决赛周。