曼联澳洲集训尾站，移师珀斯对阿士东维拉。「红魔鬼」今夏改朝换代，新帅坦哈格执教下全队充满朝气，季前热身赛3连胜，多位主力咸鱼翻生，加上佢哋近3场球会赛均半场领先，极之抢缰，预计维拉难以抵挡，相信曼联半场都可以领先。

（周六下午5时45分开赛）

曼联今夏增兵计划稍迟，直至近日先至连续签入杜维尔马拉西亚、基斯甸艾历臣及利辛度马天尼斯。不过一班旧将不断制造惊喜，喺曼谷进行嘅首场热身赛即以4比0大炒宿敌利物浦，成功激起斗心。之後转赴澳洲又以4比1大胜墨尔本胜利，再以3比1轻取英超对手水晶宫。喺C朗仍未归队下，一直不获重用嘅安东尼马迪尔连续3仗有「士哥」，一洗颓风，两位英格兰代表队成员查顿辛祖同拉舒福特亦3场入2球，全队愈踢愈有信心。

维拉上季喺领队谢拉特带领下表现不俗，今夏主要买入西维尔中坚迪亚高卡路士，并向巴塞签入借将菲腊比古天奴。虽然上两仗热身赛分别1比0小胜列斯联及布里斯班狮吼，但论状态始终不及上晒力嘅曼联，而且「红魔鬼」近仗热身赛都非常认真，往往派遣强阵出击，务求做到先声夺人，曼联半场领先话咁易啦！