除咗英超，德甲今晚亦揭开战幔！开锣战由法兰克福主场火并拜仁慕尼黑。「法福」获决心踢争气波嘅马里奥葛斯加盟，攻力提升，班霸拜仁更豪使1.5亿欧元（约12亿港元）大事扩军，新兵沙迪奥文尼亦极速融入，加上双方近年碰头入局例快，1.5球嘅半场大咪错过。

（周六凌晨2时30分开赛）

法兰克福上季勇夺欧霸，藉此获得今届欧联入场券，为咗应付多线作战，球队除咗签入南特前锋高路梅安尼，以及利华古逊前锋艾拿利奥，亦获得进攻中场马里奥葛斯来投；呢位2014年世盃决赛为德国一箭定江山嘅英雄，近年效力荷甲燕豪芬表现有番起色，为力争重返「日耳曼兵团」再战年底举行嘅世盃决赛周，今夏重返德甲加盟法兰克福，斗心毋庸置疑，连同原班阵容包括菲腊高斯迪、鎌田大地、山度士波里等，攻力有保证。

经历一段时间嘅转会风波扰攘後，拜仁虽然留唔住王牌前锋罗拔利云度夫斯基，但佢哋今季斥资1.5亿欧元大事增兵，获得利物浦前锋沙迪奥文尼、祖云达斯中坚马菲斯迪历特等相继加盟，阵容依然星光熠熠，同时令内部竞争更趋激烈。

拜仁於上周德超盃激战RB莱比锡赢5比3，该仗文尼表现抢镜攞到「士哥」，值得留意系拜仁5个入球均由唔同球员取得，连失去正选嘅利莱辛尼，後备落场都喺末段埋斋，大军火力全开。睇番两队近7次交手，有5次半场开出2球或以上，可见大家於初段表现抢缰，半场大不容错过。