曼联喺英超作客惨吞宾福特4蛋，除咗後防犯咗低级错误之外，全队死气沉沉嘅表现亦系重要原因，数据显示曼联喺3项依靠活力嘅指标，全部都被宾福特辗压，班球员食晒猪油糕咁跑唔郁，领队坦哈格有咩战术都唔掂啦！

首先系跑动距离，宾福特全队合共有109.4公里，虽然只系同英超球员场均跑10.14公里相差无几，但已经赢曼联嘅95.6公里成条街！除此之外，宾福特全队有90次全速冲刺，平均每分钟就有1次，但曼联只有65次，完全被比下去。

坦哈格一直强调要进行前场逼抢，但「红魔鬼」今场只系得7次喺前场施压，反而宾福特有多达21次，包括逼甩基斯甸艾历臣脚下球射成2比0。球员唔争气，但坦哈格亦责无旁贷，事关曼联依家班球员不擅逼长都唔系第1日，但佢嘅排阵就冇乜大变动，自然难有好结果。