周日(14日)凌晨法甲，巴黎圣日耳门(PSG)又大胜1场，主场以5比2击败蒙彼利埃，尼马个人梅开二度，成为PSG近45年以来，首位法甲开季头2场入到3球嘅球员。

巴黎圣日耳门球星基利安麦巴比今场复出，「MNM」锋线人齐上阵，PSG喺22分钟获得12码，但麦巴比主射，被蒙彼利埃门将庄拿斯安连扑出。

不过，PSG打开纪录嘅1球，麦巴比都有功劳，佢右路传中，导致对手法拿那沙高摆乌龙。上半场尾段，PSG再次获得12码，今次改由尼马主射入网。

换边後冇耐，尼马罕有以飞身头槌顶入，可见佢真系非常搏命。蒙彼利埃虽然由前锋卡斯里入番1球，但阻挡唔住PSG强攻，基利安麦巴比、连拿度辛捷士各建一功，为PSG领先至5比1，即使补时蒙彼利埃入多1球，都对大局冇影响。

包括法冠盃在内，PSG近3场正式赛事全胜，合共轰入14球。

主角尼马今场4次射门入2球，8次尝试扭过对手有5次成功，仲有98次触球，犹如球队进攻大脑，呢位30岁巴西国脚日前落选今届金球奖30人候选名单，今仗以行动证明实力，作出最有力反击。