葡萄牙球星C朗拿度今夏向曼联提出转会要求，但至今仍「滞留」曼彻斯特，周日(14日)作客宾福特今季首度担正，即遇上惨输0比4嘅耻辱战果。完场後C朗心情极差，拒绝助教麦卡伦要求向随队球迷道歉外，甚至喺坦哈格身边行过都全无交流，直情当领队「透明」！

今场踢足90分钟嘅C朗表现低迷，完场後喺嘘声中「行屍走肉」咁慢慢步离球场，期间助教麦卡伦要求佢留低，同全队一齐向随队作客嘅球迷道歉，但C朗就一於少理继续走向更衣室，到场边更喺皱晒眉嘅坦哈格身边走过，但两人全无身体或者目光交流，形同陌路人。

据《曼彻斯特晚报》报道，迪基亚、麦汤米尼、拉舒福特、艾兰加、般奴费南迪斯、云迪碧克同达洛治都有当面同球迷道歉，而哈利马古尼就只系离远向球迷鼓掌示意，随即就跟埋C朗返更衣室。C朗喺热身赛曾经未完场就离开，被坦哈格公开炮轰破坏团结，唔知今次会唔会再受责备。

虽然C朗嘅态度令球迷失望，但亦有唔少球迷为佢辩护，有网民留言：「C朗嬲系好应该，今场输系因为条防线好唔掂，唔应该次次都搵C朗嚟做箭靶」、「C朗要求离开曼联，就系唔想经历呢啲咁嘅赛事」。