今晚英冠独脚戏，西布朗主场斗般尼。西布朗喺庸帅布鲁士领导下，愈踢愈颓，相反般尼喺少帅高柏尼领军後渐入佳境，两军斗心高下立见，般尼仲有得受让咁笋，让球客胜咪错过。

（有线661及601台周六凌晨3时直播）

西布朗上季季中搵嚟经验丰富嘅布鲁士执掌球队，点知呢位前纽卡素领队极度保守，搞到队波愈踢愈唔对路，最终只排第10位，令人失望。今季西布朗表现依然未有改善，开咧7仗联赛仅得1胜5和1负，频频失分影响士气，其中5仗更系先失波，依家喺中游徘徊，争升班嘅路途愈嚟愈遥远，布鲁士可谓责无旁贷。

另一边厢，今季降落英冠嘅般尼请嚟曼城名宿高柏尼接手。虽然呢位前比利时队长教波经验尚浅，但经过季初起伏期後，近期明显反弹，连盃赛在内3连胜兼轰入8粒，老将前锋积洛迪古斯咸鱼翻生，喺联赛射入3粒，小将尼敦泰拿及贝利斯亦愈踢愈好。般尼目标重返英超，斋讲战意赢晒，作客分分钟赢埋唔奇，让球客胜有计。