车路士聘请朴达执教後，首次领军只能够喺欧联打和萨尔斯堡，由於今个周末对利物浦嘅联赛延期，为确保球员可以透过比赛保持状态，周六(17日)特别安排一场闭门热身赛，最终车路士2比1小胜朴达旧东家白礼顿。

车路士对利物浦联赛延期後，英超亦暂停让路国际赛，车仔下场比赛要去到10月1日作客水晶宫，朴达特别搵白礼顿嚟踢闭门热身，事关白礼顿原定今个星期对水晶宫嘅联赛同样延期。车路士喺欧联对萨尔斯堡有份上阵嘅球员今场都休息，但仍有基斯甸普列锡、干拿加历查、保查等球星上阵。

朴达喺今场热身赛都有收获，18岁中场新星卓克禾美卡个人包办2球，协助车路士赢2比1，呢位英格兰小国脚今夏加盟车路士後，仍未有机会喺一队上阵，向来锺意提拔新人嘅朴达，经过今场後或者会畀机会佢上阵。