欧国联A3组出线之战，匈牙利主场迎战意大利。相信事前冇人估到，牌面最弱嘅匈牙利现时力压意、德、英3大强国排榜首，今仗对意大利只要保持不败就可出线4强，战意高昂，佢哋近3仗全部先入波，意军防守亦唔见稳阵，匈牙利「第一队入球」好路。(周二凌晨2时45分开赛)赛事前瞻

匈牙利现以5战3胜1和1负得10分排榜首，领先次席意大利2分，今仗唔输就可出线，佢哋喺小组赛两胜英格兰，对德国1胜1和，作客意大利亦仅输1比2，今仗再斗意大利可谓目标明确，上仗「蠍子式入球」1比0击败德国嘅施沙拉尔，早前表明今个国际赛後将会退出国家队，今场对意大利将会系佢告别赛，正是临别秋波，今场先入波随时就系佢。

意大利世盃出局後冇晒方向，而且人才凋零，3个後衞仲系35岁嘅邦路斯、34岁嘅法兰斯高阿沙比同31岁嘅拉菲尔杜莱，呢条「百岁防线」好难唔失波，至於双箭头系23岁嘅施卡马卡同22岁嘅拉斯柏度尼，略嫌经验不足，中场佐真奴欠缺大心脏，喺关键时刻就会甩辘，否则意大利都唔会痛失世盃入场券，而且今场形势上焗攻，更有利匈牙利打快速反击，先入波更有把握。