阿仙奴周六(1日)出战「北伦敦打吡」前出现噩耗，英格兰中场伊美路维因鼠蹊伤患严重，球会宣布已为佢做手术根治，最快都要12月先可以重投操练，意味佢肯定错过11月开始嘅世界盃决赛周。不过「兵工厂」都有好消息，据报阵中4名伤兵已经康复，有望喺对热刺一仗上阵。

22岁嘅伊美路维上年大爆发，仲入选埋英格兰国家队兼继承阿仙奴件10号波衫，上季虽然受伤患困扰仍有10个英超入球，不过今季一直长居後备，据报佢系持续受到鼠蹊伤患影响，阿仙奴周四(29日)发出声明，证实佢听取专家意见进行手术彻底根治伤患，目标系12月复操，肯定错过世界盃决赛周。

虽然伊美路维长抖，但阿仙奴周六主场对热刺前都有好消息，喺国际赛期间受伤退队嘅汤马士柏迪、基兰泰亚尼同富安健洋，以及较早前受伤嘅左闸辛真高，据报都已经克服伤患，可以喺呢场「北伦敦打吡」候命。