艾宁夏兰特今季喺曼城极速起飞，所有赛事上阵12场交出19球3助攻嘅怪物级数据，震惊全球，曼城上下不但锡晒佢，仲有金钱实质奖励，英国传媒爆料，夏兰特每星期嘅入球奖金，令佢收入由原本周薪35万镑，增加至每周收入85万镑，暴增2.4倍。

《每日邮报》报道，夏兰特基本薪酬同其他曼城高收入球员处於同一水平，周薪大约系35万镑，另外仲有浮动条款，其中入球奖金变成呢位挪威锋霸嘅提款机，佢依家每星期收入，暴增至85万镑。

单计上周夏兰特入球数字，曼市打吡入3球，欧联对哥本哈根入2球，总共入5球，如果每周收入系85万镑，扣除基本周薪35万镑後，额外所得嘅50万镑如果系入波奖金，围埋每入1球有10万镑。

不过奖金数字可能有偏差，因为曼城当初签夏兰特系启动多蒙特解约条款，只需6000万欧元相对低价，因此会方愿意开出更高薪酬及奖金畀夏兰特。

传媒估计，按照现有情况发展，夏兰特今季将可在曼城支取4500万镑报酬，大把钱嘅曼城肯定乐意支付，其他队友亦唔会眼红，因为佢实在太犀利。