今晚英超独脚戏，宾福特主场硬撼「海鸥」白礼顿。宾福特近况下滑，防守不稳系主因；白礼顿喺新帅迪萨比带领下秉持进攻打法，而且「海鸥」客场踢得特别开放，2.5球入球大更值博。

（Now 621周六凌晨3时直播）

宾福特季初大胜曼联4比0而爆红，箭头艾云东尼更因频频入波获英格兰徵召，可惜之後无以为继，近6仗联赛只得1胜3和2负。佢哋最大问题系有前冇後，开季至今联赛共入16球，攻力绝对唔弱，不过失咗17粒，与修咸顿并列联赛失波第5多球队，上仗作客纽卡素更惨败1比5，防线穿晒窿。

另一边厢，白礼顿虽然有主帅朴达过档车路士，好彩接手嘅意大利籍教头迪萨比同样崇尚进攻，上任首仗作客利物浦即激和3比3，李安度杜沙特更上演帽子戏法，充满娱乐性，上仗主场对住同乡干地领军嘅热刺，全场控制大局下输0比1坚唔抵。「海鸥」今季联赛入咗14球，其中有8球系作客，入波比主场更多，连同盃赛在内，近5仗作客共轰11粒，有4仗开3球或以上，造访犹如不设防嘅宾福特实多波入，大盘稳开。