金球奖被视为足球员嘅个人最高殊荣，对上13届嘅金球奖奖座，有12届落喺美斯同C朗拿度手上，不过对上2届得主美斯，今届连30人候选名单都入唔到，而C朗最後亦只系排第20位。对上一次C朗同美斯一齐入唔到金球奖前19名，已经系2005年嘅事，当年C朗又系排喺20位，而美斯一样冇份入围。

自2008年C朗首夺金球奖开始，2大球王合共包揽12届冠军，只有莫迪历(2018年)同宾施马(2022年)打破垄断，有趣嘅系2人都系以「80後」嘅老将身份攞奖，金球奖从来未落入「90後」球员手上，即使尼马、奇云迪布尼等「90後」都系世界顶尖，最接近金球奖嘅「90後」球员系2019年嘅华基尔云迪积克(91年出生)同今届沙迪奥文尼(92年出生)，2人都只系拎到第2名。

至於92年出生嘅南韩前锋孙兴民，今届金球奖排喺第11位，打破佢自己喺2019年保持嘅第22位纪录，系亚洲球员系金球奖史上最高位置，事实上「老孙」亦系历来唯一一个喺金球奖拎到选票嘅亚洲球员。