今晚英联盃第3圈续有英超内讧，曼联返主场迎战阿士东维拉。双方事隔4日再交手，曼联日前意外输波，各项赛事9场不败断缆，梗系想趁机报仇，加上主场出击特醒，唔会再畀机会维拉偷鸡，主胜有计。(有线661及601台周五凌晨4时直播)

曼联继上仗英超作客输1比3後，於今仗英联盃再斗维拉，红魔返回主场复仇心切。虽然两军都会作出轮换，但论副选实力，曼联点都秤先啲，尤其系上仗分别喺上下半场初段劲唔集中，已经畀主帅坦哈格闹爆球员入局慢，未有付出百分百争胜决心，呢点系佢完全不能接受，今场众将一定会打醒十二分精神，就算只系英联盃亦唔敢怠慢，加上近5场主场取得4胜1和，势必趁机复仇。

另一边厢，维拉上仗有新帅艾美利首度领军，立即击败曼联，的确可提升信心及士气，不过佢哋喺联赛深受降班威胁，应会集中力量踢英超，未必可兼顾埋盃赛，艾帅识得分轻重，今仗随时有所保留。

维拉今季客场成绩差劲，近5场作客不胜之余，近2仗更大败而回，何况曼联之前2次输波，下仗都立即赢波反弹，睇埋佢哋近10次主场对维拉，录得8胜1和仅1败，主胜不容错过。