周六（12日）晚英超头场，「蜜蜂仔」宾福特凭住艾云东尼一吐乌气省两粒，爆大冷作客以2比1击败曼城，令「蓝月亮」今季联赛第2度输波之余，亦打破佢哋跨季13仗联赛主场不败纪录，随时益咗榜首阿仙奴。

曼城上周中英联盃赢车仔之役收起艾宁夏兰特，呢位王牌今仗复任正选，并有贝拿度施华、菲尔科顿及奇云迪布尼支援，但点估到赛前喺今季作客联赛未赢过嘅宾福特，一开波竟然反客为主，在麦比奥莫及艾云东尼错失良机後，喺16分钟门将大衞拉耶於後场开出死球，宾美头槌二传畀艾云东尼近门顶入，先开纪录，呢位啱啱落选英格兰世盃大军嘅箭头一吐乌气。「蓝月亮」之後两次对方喺禁区疑似手球及犯规却未获12码，去到完半场前迪布尼开出右路角球，菲尔科顿起左脚怒射挂网扳平。

易边後曼城继续狂攻，不过中坚拿朴迪头部受伤扰攘咗一段时间，好彩呢位铁衞冇事可紮住上，之後夏兰特回传畀根度简射高最具威胁，而今仗刑满复出嘅祖奥简斯路远射被大衞拉耶扑出，最惨系去到补时阶段，仲畀艾云东尼整多粒，最终爆大冷输波收场，亦系曼城跨季近13仗联赛主场取得12胜1和後，首度主场落败。