澳洲今次大军名单有1位小将引起全球注目，就系年仅18岁前锋加兰古奥，呢位新星唔止好波，而且成长经历非常励志，由难民晋身澳洲国脚，参加世界盃，明年仲有机会踢英超，简直可以拍成一部电影。

加兰古奥来自一个南苏丹家庭，父母走难去埃及後诞下呢位球坛明日之星，其後全家以难民身份移居澳洲。加兰古奥几兄弟自细就同足球结下不解之缘，哥哥古奥上年4月加盟德甲球队史特加，由二队踢起。

至於加兰古奥上年1月加盟中岸水手足球学校，并迅速获提升上一队，上季澳职上阵9场入4球，今季踢4场已入2球，英超「新土豪」纽卡素都畀佢吸引住，9月中同加兰古奥达成协议，将於明年1月转会市场重开後正式加盟，就知佢非池中物。

澳洲主帅艾莱特自然顺应民意，拣选加兰古奥入大军名单，令佢成为澳洲史上参加世界盃最年轻球员。

曾经效力朴茨茅夫等欧洲球会嘅澳洲名宿艾莱斯亦大赞加兰古奥潜力无限，可以喺今届世界盃大放光芒。