英足盃16强赛事，衞冕嘅曼城作客卢顿，两队虽同属英超球队，但实力悬殊，「蓝月亮」正力争衞冕「三冠王」，睇重英足盃，卢顿喺榜下游挣扎，论牌面曼城赢面高唱入云，不过佢哋近4场英足盃作客，有3次半场开1球或以下，所以上半场唔会过分进取，1.5球半场细值得留意。（无綫myTV SUPER周三凌晨4时直播）

近期欧联重开，曼城要3线作战，早前欧联16强首回合作客哥本哈根顺利赢3比1，而联赛佢哋同利物浦及阿仙奴争持不下，加上英足盃杀入16强，衞冕「三冠王」同步进行，3项赛事都会全力作战。

而曼城最大优势，就系唔怕频密赛程，哥迪奥拿手上人脚充裕，而且不论主力及轮换阵容实力都拥有强劲战斗力，佢哋现时只有加华度尔一名伤兵，今场「夫添」出击有信心赢波过关，不过近2场联赛对宾福特同般尼茅夫都只系险胜1比0，进攻表现麻麻，今场就算赢到卢顿都只能小胜。

必须注意嘅系，今场赛事安排喺卢顿主场凯尼沃斯路球场举行，球场为符合英超要求已进行修葺，但容量始终有限，曼城要喺呢个「细场」作战不利控传打法，发挥打折扣，仲随时可能「氹仔浸蛟龙」，因此必须万事小心。事实上卢顿藉主场出击往往打高一皮波，试过大炒白礼顿4比0，同埋赢过纽卡素，不过射手伊利亚艾迪巴约受伤缺阵，攻力下降情况下，只能加强防守继续摆铁桶，加上曼城踢得谨慎，上半场好可能睇定先，1.5球半场细最有计。