英国《每日邮报》报道，指阿仙奴技术总监伊度已经同曼城前锋加比尔捷西斯嘅代表联络，希望为兵工厂今夏签入呢位25岁巴西前锋。

阿仙奴2位前锋拿卡锡迪、尼基迪亚好可能今夏自由身离队，伊度首要工作系为球队补充射手，结果睇中巴西同胞加比尔捷西斯，甚至已经同「耶稣仔」嘅代表团展开谈判几个月，希望加比尔捷西斯入「厂」。

加比尔捷西斯将於明年夏天约满，由於曼城领队哥迪奥拿经常用「无锋阵」，「耶稣仔」一直未能稳坐正选，今季英超仅有3球进帐，令佢意兴阑珊，近年亦不时传出呢位巴西国脚离队嘅消息，既然阿仙奴有意接手，双方有望一拍即合。

兵工厂锋线上仲有另1位巴西球员加比尔马天尼利，下季2位「加比尔」有机会合作攻坚。