虽然中国队无缘参加今届世界盃，但决赛周仍有中超球员身影，就系效力上海申花嘅喀麦隆前锋巴苏高，呢位27岁射手入选国家队，令到当时待产嘅老婆非常激动，几乎早产，幸好最後顺利分娩，母女平安。

巴苏高成为职业球员後，最威水只系效力丹麦球队阿尔堡，并曾为喀麦隆上阵44次入7球。佢5年前已经去中超搵食，入波数字并唔多，佢今次可以入选喀麦隆出战世界盃大军名单，令人意外，包括佢老婆都估唔到。

根据巴苏高透露，当时身处法国待产嘅老婆睇电视新闻，知道佢入选国家队後，表现非常激动，大呼大叫，吓到医生及护士立即将「巴嫂」推入手术室接生，结果发现原来摆乌龙。

事後「巴嫂」致电巴苏高通知佢入选，佢当时仲唔信，直至收到喀麦隆领队尼高拔桑治电话，先至知道老婆唔系讲笑。

巴苏高仲话对於未能陪住老婆分娩，觉得好内疚，幸好BB女顺利出世，佢第3次做爸爸，希望自己能够喺今届世界盃入波，送畀细女作为礼物。