墨西哥喺C组首仗0比0闷和波兰，门将奥祖亚勇救罗拔利云度夫斯基嘅12码成为大英雄，球迷对呢位37岁老将既熟悉又陌生，虽然佢喺球会生涯籍籍无名，但每4年踢一次世盃决赛周都会爆红，今场佢救出12码後，有女球迷激动到即场爆喊。

因貌似吴镇宇而被香港球迷称为「Sam哥」嘅奥祖亚，依家效力国内球会CF阿美利加，过去曾效力过阿些斯奥、马拉加、CF格兰纳达、标准列治等球会，平时基本上冇球迷会留意到佢，但第5次代表墨西哥出征世盃嘅佢，每次都喺呢个世界舞台大放异彩。

2006年首次踏足世盃舞台，奥祖亚喺2014世盃分组赛面对东道主巴西，作出6次神奇扑救帮墨西哥守和0比0，表现震惊全球，上届世盃分组赛对德国，更加9次扑救助球队赢1比0，今次面对世界足球先生得主罗拔利云度夫斯基12码，成功扑救帮墨西哥力保不失，再次扬威世盃。

奥祖亚成为墨西哥自1930年後，第1个喺世界盃救出12码嘅门将，佢赛後自爆曾做功课研究「罗拔仔」嘅12码：「好开心救出12码，而且仲保持0失球，呢1分对墨西哥非常重要，我同教练喺1个月前已经开始研究罗拔利云度夫斯基嘅12码。」