法国周三(23日)凌晨进行世盃衞冕第1击，喺先落後情况下4比1大胜澳洲，打破近16年衞冕球队喺世盃首战不胜魔咒。法国喺决赛周前有主力宾施马受伤退队，但顶替佢嘅基奥特就交足货，头顶脚踢梅开二度，呢2个入波亦令佢以51球，追平亨利成为法国史上入波最多球员。

过去12届世盃，只有3支衞冕球队可以喺世盃首仗赢波，对上一支已经要数到2006年嘅巴西，法国今场亦先食惊风散，开波9分钟就走甩奇治葛云先失守，不过法国企稳阵脚後即控制战局，27分钟由拉比奥特头槌追平，5分钟後拉比奥特前场截击成功，交畀基奥特射成2比1。

下半场系法国天下，68分钟基利安麦巴比接应奥士文尼迪比利右路传中顶入，71分钟基利安麦巴比左路突破传中，基奥特铜头一摇顶成4比1完场。法国大胜後喺D组排榜首，丹麦同突尼西亚各得1分，而澳洲就0分排榜尾，法国喺次轮将会大战丹麦。

上届世盃法国捧盃，基奥特喺7场比赛全部上阵(6场正选)但1球都冇入到，已经36岁嘅佢今届原本会做宾施马後备，但依家临危受命担正，第1场波就轰入2球，佢喺法国累积51个入球，追平传奇前锋亨利纪录，成为法国史上入波最多球员，若果法国可以继续晋级，基奥特独揽宝座亦系迟早问题。