葡萄牙「死亡H组」第一击，今晚面对加纳嘅挑战。葡军近4次世盃对非洲球队3次半场领先，包括2014年曾以2比1击败今仗对手加纳，佢哋往往把握到非洲球员入局慢嘅弱点，发动闪击战攻击，加上C朗搞掂同曼联嘅瓜葛，可以专心应战，肯定更落力，今场仲有免费直播，一於玩个半场主胜，睇住波45分钟就收钱。（ViuTV 99、Now 618及616周五凌晨12时直播）

新闻人物C朗日前已经讲到明，自己嘅新闻唔会影响葡军士气同发挥。事实上，今届世盃全球焦点都系佢同美斯两人，前日美斯输波，C朗难免更加肉紧，难怪香港球迷用「球玉」形容C朗，就系话佢每样嘢都要做得多一啲，叻人一啲，所以喺球王个「王」字加多一点畀佢变成「玉」。

葡萄牙喺备战最後一场热身赛，刻意约战非洲球队尼日利亚，喺C朗因病缺席下仍然大炒对手4比0，今场有埋C朗复出，实力无疑更进一步。事实上，C朗对住非洲球队特别有计，对上两届世盃分别斗摩洛哥及加纳均成功取得入球，葡萄牙喺世盃近4战斗非洲兵，亦有3次半场取得领先，格食格味道甚浓，加上现时球队拥有多名世界级球员，如安达施华、贝拿度施华及祖奥简斯路等，已非「一人球队」。

加纳虽有唔少外流球员，但甚少效力具争标实力嘅球队，前线仍要靠水晶宫嘅佐敦阿休及毕尔包嘅伊拿基威廉斯等，稍具实力嘅只系阿仙奴中场汤马士柏迪，预料难抵葡军强攻，半场主胜稳开。