世界盃B组「英美大战」亦系2位效力多蒙特嘅金童对决，英格兰19岁中场祖迪比寜咸上仗为球队打开纪录，表现抢镜。至於美国20岁新星基奥云尼雷拿被誉为「北美马纳当拿」，2位新世代球星亦敌亦友，今仗交锋肯定好睇过戏。

祖迪比寜咸成为近期最炙手可热新星，今季为多蒙特上阵22场入9球，被认为系英格兰史上罕见嘅全能中场，获得皇马、利物浦、曼城等大球会垂青，估计身价高达1.3亿镑。

至於能够担任翼锋及进攻中场嘅基奥云尼雷拿出身於多蒙特青年军，2年前已经冒起，佢系名将之後，爸爸系曾经效力利华古逊、格拉斯哥流浪、新特兰、曼城等欧洲球会嘅雷拿，「小雷拿」亦喺英格兰出世，但佢选择代表美国。

基奥云尼雷拿个人技术出众，其中今年3月世界盃外围赛对墨西哥，佢个人突破扭过对方6位球员，被指似足1986年世界盃阿根廷球王马纳当拿以一人之力摧毁英格兰。英军今次遇上呢位「北美马纳当拿」，真系要打醒十二分精神。

另外，美国有多位球员效力英超球会，包括车路士翼锋基斯甸普列锡、阿仙奴门将马特端纳、列斯联後衞泰拿阿当斯等，两队交锋可以话英超旧生聚会。