车路士季初换帅，请来朴达执教，但成绩仍然冇改善，近5场英超不胜，会方急不及待准备下月冬季转会市场重开後，增兵提升实力。英国各大传媒指车仔已经同挪超球会莫迪达成协议，以1,050万镑收购莫迪射手大衞科芬拿救亡。

由於车路士年轻射手布查早前踢热身赛受重伤，需要长抖，得番奥巴美扬1位正前锋可用，所以会方迅速出手斟掂大衞科芬拿。

呢位20岁新星身高1米81，刚过去挪威球季为莫迪各项赛事上阵39场入22球，成为球队夺得挪超冠军嘅功臣，吸引车路士主帅朴达注意，提出将佢收购旗下。

莫迪已经同意将大衞科芬拿出售畀车仔，只要佢通过体测及达成个人待遇协议，就可以完成交易。值得一提，大衞科芬拿同车仔传奇射手杜奥巴都系科特迪瓦人，球迷都好期待佢成为「新魔兽」，协助车路士重返颠峰。

另外，车路士嘅法国後衞韦斯利科芬拿，都有科特迪瓦血统，届时两位「科芬拿」并肩作战一攻一守，真系考起讲波佬。