英超神奇球队宾福特好事一单接一单，继早前击败劲旅利物浦之後，依家再宣布向美职国际迈亚密借用「最有魅力星二代」罗密欧，呢位20岁中场系「万人迷」碧咸第二个仔，佢会效力宾福特B队半年，为将来参加英超铺路。

碧咸3位儿子之中，以罗密欧最有「足球细胞」，而且同爸爸一样踢右中场，上季为国际迈亚密B队踢「MLS Next Pro」联赛，上阵20场入2球及10次助攻。球季结束之後，佢喺上年10月前赴宾福特预备组跟操，表现唔错，最终获得半年借用合约，成为宾福特B队球员。

罗密欧签约之後话：「我好荣幸可以加入宾福特，原本来呢度跟操只系为咗保持状态，依家成为正式球员，令人好兴奋。」宾福特B队教练麦法兰大赞罗密欧技术出众，由佢一开始跟操，已经留下深刻印象。

罗密欧嘅哥哥布鲁克林早年曾经去阿仙奴跟操，但未获留用，其後更放弃做足球员，细仔告斯亦唔多热衷足球，以目前情况睇，罗密欧最有可能继承碧咸嘅衣钵。