车路士周日(15日)英超主场1比0击败水晶宫，成功终止3连败走势，最令球迷开心嘅系，开波前以1亿欧元转会费加盟嘅乌克兰新星梅迪克，有份入场睇波兼同球迷见面，不过披住乌克兰国旗亮相嘅梅迪克全程笑容唔多，有传系同车路士球迷支持俄罗斯前班主阿布拉莫域有关，令梅迪克身份变得尴尬。

车路士凭夏维斯一箭定江山赢水晶宫，由萨克达加盟嘅梅迪克，喺上半场进行期间亦正式落实转会，不过当佢披住乌克兰国旗走入史丹福桥球场，并冇表现出雀跃神情。英国名嘴皮尔斯摩根就提出一个理论：「梅迪克去车路士令人震惊，一个乌克兰球员，竟然会去一个球迷支持普京(俄罗斯总统)最好朋友(阿布拉莫域)嘅地方。」车路士主场赛事，一直有球迷唱支持前班主阿布拉莫域嘅歌曲，抗议阿布被英国政府制裁而被迫卖盘。

之前一直有传梅迪克会转投阿仙奴，但车路士最终成功截劫，《独立报》指车路士开出10万镑周薪，比阿仙奴嘅5万镑高出1倍，而且更加系一份8年半嘅超级长约，成功说服梅迪克加盟。