诺定咸森林喺英联盃8强互射12码淘汰狼队，由曼联借用嘅门将甸恩轩达臣成为晋级英雄，佢喺互射12码先救出鲁宾尼维斯射门，再喺决定性嘅最後一射救出鹤治射门，带领森林自1992年後再闯英联盃4强。

森林喺4强抽签收到噩耗，唔单止因为抽中对曼联，更大问题系甸恩轩达臣将唔能够上阵，根据英联盃条例6.3所写，外借球员(甸恩轩达臣)将会被禁止倒戈，除非原属球会(曼联)书面提出容许借将上阵。普通预料曼联唔会咁大方，为自己晋级决赛之路增添难度。

森林领队谷巴赛後表示：「呢个消息(轩达臣被禁倒戈)打断我哋嘅庆祝，我好失望，特别系睇完甸恩轩达臣今场嘅出色表现......甸恩轩达臣系森林一份子，佢已经完全融入森林大家庭，知道佢唔可以喺4强上阵，破坏晒我今日嘅心情。」