热刺领队干地同球会合约到季尾完结，续约一事迟迟未有着落，有传闻呢位意大利教头将会离队。干地近日表示，过去4个月经历3位好友先後离世，令佢明白家人同朋友嘅重要性，心痛经历会影响佢对前途嘅考虑，似暗示会重返意甲。

热刺体能教练兼干地多年战友云杜尼，上年10月因急性血癌去世；意甲名将米赫洛域亦喺12月因病与世长辞；同干地喺祖云达斯同意大利国家队合作嘅维埃里，今个月亦魂归天国，短时间内失去3位好友，干地表示：「今季对我个人嚟讲系困难嘅一季，短时间失去3位好友，令我重新思考未来。当我哋寄情足球，有时会忘记家人同朋友，为足球我哋放弃咗好多，但呢啲事情令我反醒，生活唔系只系得足球，系咪要放多啲时间去陪家人同朋友。」

虽然干地喺伦敦工作，但为咗迁就佢嘅15岁女喺意大利读书，老婆同家人都仍然喺意大利生活，干地要喺赛程空档先可以飞返意大利陪屋企人，如果佢约满後决定唔续约热刺返去意大利，相信球迷亦会体谅。