曼城喺欧联被RB莱比锡逼和1比1，领队哥迪奥拿嘅调兵遣将再受质疑，球队喺下半场劣势之下，全场竟然冇作出任何换人，系欧联5年来首次有球队全场「0」换人。哥迪奥拿完场後更罕见召集球员喺场上训话，不过哥帅并非不满球队，反而大赞球员表现出色。

即使有菲尔科顿、祖利安艾华利斯等球星坐喺後备席，但哥迪奥拿今仗选择用正选11人踢足全场，系自曼联2018年10月对祖云达斯後，首次有球队喺欧联唔作任何换人，哥帅赛後解释：「我有5个换人机会，唔代表我一定要换人。我哋分析过对手，认为控制场面系最重要，德国球队喺攻守转换非常快，我哋冇足够球员去同佢哋竞争。」

完场後曼城并冇即刻返更衣室，反而留喺场中接受哥迪奥拿训话，令人觉得哥帅非常不满，但事实系哥帅对战果好满意，哥迪奥拿表示：「我问球员点解要垂头丧气，佢哋踢得好好，做晒应该要做嘅事。我预咗今场会好难踢，唔通你想我哋嚟德国赢4比0？对唔住我哋嘅实力做唔到。」