西班牙传媒爆料，指美斯拒绝巴黎圣日耳门(PSG)提出嘅减薪续约要求，由於呢位35岁阿根廷球王将於今夏约满，意味一旦倾唔掂数，就会走人，届时势必引来各大豪门争夺。

上年世界盃举行之前，盛传美斯同意同PSG续约1年，但後来情事有变，由於呢间法甲富豪球会受到公平财政条例限制，需要球员整体减薪30%，会方希望美斯同球会一齐共度时艰，但呢位射手拒绝，令续约谈判陷入僵局。

事实上，美斯即使年纪唔细，但仍然保持高水平状态，今季为PSG上阵28次入17球及16次助攻，上年12月协助阿根廷捧世界盃冠军，加上早前当选世界足球先生，的确冇理由接受减人工。

据悉已经有唔少球会对美斯虎视眈眈，包括佢嘅母会巴塞隆拿、美职球队国际迈亚密。不过巴塞财政欠佳，恐怕无力负担美斯人工，佢无意离开欧洲球坛，去美职搵食机会唔大。

撇开PSG，有能力签到美斯嘅欧洲豪门，可能得车路士、曼城、拜仁慕尼黑。