周六(13日)晚英超爆发抢分战，曼联主场迎战狼队。「红魔鬼」近期经历2连败，联赛前4之争有暗涌，今场对住已经上岸嘅狼队唔可以再有甩漏，睇番佢哋喺奥脱福主场表现对办，已累积26场不败，近5仗联赛主场录得4胜1和，赢波机会高，让1球、球半照捧上盘。(Now 621周六晚10时直播)

曼联上仗作客0比1不敌韦斯咸，连同前仗输畀白礼顿，联赛2连败，门将迪基亚喺上场犯严重失误，领队坦哈格焗住撑佢，希望可以维持士气，佢哋连场失分下，令到英超前4之争变得紧凑，纽卡素、曼联、利物浦同热刺4队争2个位，其中排第4嘅曼联仅领先利物浦1分但少踢1场，要保住联赛前4已经冇乜失分空间。曼联余下4场英超对手，包括今场对狼队、般尼茅夫、车路士、富咸。

虽然红魔有抢分压力，但球队仍然有优势，佢哋最强武器就系喺奥脱福主场，自去年10月至今共累积26场主场不败，当中22胜4和，胜出率超过8成，今季余下4轮联赛亦有3场系主场，今仗返主场出击，有望赢波反弹。

狼队近期连场抢分後，现时累积40分已经提前3轮护级成功，佢哋近6仗4胜2负，其中4场胜仗都系主场，作客2仗全败共失8球，包括上次作客白礼顿输0比6，今仗到访奥脱福球场，极可能吞蛋而回。