罗马後衞罗渣伊宾尼斯获沙特球队吉达艾阿里挖角，转会已成定局，主帅摩连奴在个人社交网出PO与爱徒道别，留言话伊宾尼斯去中东发财咁好搵，记得请食饭。

转会专家罗曼诺用招牌嘅Here we go！标题报道呢宗交易，吉达艾阿里将会签入罗渣伊宾尼斯，转会费超过3,000万欧元(约2.57亿港元)，签约3年。

24岁嘅罗渣伊宾尼斯司职中坚，效力罗马4个球季，上阵149场入9球，系前季欧协联冠军同上季欧霸盃亚军功臣，曾代表巴西上阵2场，系摩连奴爱将。

罗马财力同中东球队当然冇得比，摩dad亦唔阻人发达，伊宾尼斯临走送咗件波衫畀佢留念，摩dad留言话：「要开心呀，我知道你会挂住我哋，多谢你嘅最後一件波衫，依家你有钱喇，可以请我同班教练食番餐，好好享受沙特之旅，我敢输赌，当你睇到呢张相，你已经成为嗰边嘅球员。」