上季英超及欧联神射手艾宁夏兰特喺社区盾踢到隐形，上阵64分钟竟然冇射门，成为曼城失「盾」罪人之一。翻查纪录，呢位挪威「入球机器」每逢决赛大战例哑火，包括近2届社区盾、上季英足盃及欧联决赛，佢都食白果，被网民嘲讽系「卢卡古」。

曼城上届社区盾对利物浦，艾宁夏兰特踢足全场，都冇波入，被对手达云纽尼斯抢晒风头。虽然事後发现，夏兰特先至系真材实料，但始终改变唔到决赛哑火问题，上届英足盃对曼联，欧联决赛对国际米兰，都入唔到波，而且整体表现亦欠佳。

夏兰特今场社区盾更加离谱到连1次射门都冇，而且9次传球只有6次成功，结果踢咗64分钟就被换走，最讽刺系入替佢嘅高尔彭马好快入波，为曼城打开纪录，希望英超开咧之後，艾宁夏兰特可以重拾射门鞋啦。