C朗拿度登陆沙特阿拉伯後，距离首个冠军只差1步！周四(10日)阿拉伯冠军盃4强，艾纳斯凭C朗一箭定江山，1比0击败伊拉克球会SC艾索达杀入决赛。连埋今场，C朗已经连续4场有波入，艾纳斯会喺周日(13日)凌晨同希拉尔对决，力争C朗喺沙特首个冠军。

艾纳斯今场继续排出C朗同沙迪奥文尼呢条梦幻攻击线，面对SC艾索达一直控制战局，不过佢哋要去到75分钟先打破僵局，沙迪奥文尼禁区内博到12码，由C朗操刀射入全场唯一入球。C朗喺分组赛最後2轮、8强同4强都有入波，绝对系艾纳斯杀入决赛最大功臣。

38岁嘅C朗赛後喺个人twitter兴奋留言：「决赛，Here we go！全队都做得好好，特别多谢球迷嘅神奇支持，你哋一直推动我哋前进！」不过，C朗要捧盃仲要过希拉尔一关，呢支同样来自沙特嘅豪门今季大事增兵，有鲁宾尼维尔、高列巴尼、马尔甘同米连高域沙域等球星压阵，唔容易应付。