曼联早前斥资7,200万镑(约7.2亿港元)收购丹麦前锋贺兰特，呢位20岁新星加盟後当然大卖口乖，话成为「红魔鬼」系儿时梦想。普遍球迷都当呢啲系「公式对白」，不过贺兰特日前就公开佢10岁嘅作文《我的志愿》，讲到明梦想系效力曼联！

贺兰特转会曼联後，接受丹麦媒体《TV2 Sport》访问大谈佢嘅曼联情结，除咗公开自己细个着曼联波衫嘅相片外，仲有一篇10岁嗰阵写嘅《我的志愿》，其中一点系话：「我嘅目标系为丹麦国家队同曼联效力。」

贺兰特嘅两个足球梦想都已经成真，上年9月正式入选丹麦国家队，至今已为国家队上阵6场，依家又成为曼联一员，贺兰特喺访问入面表示：「梦想一定要定得好大，否则你唔会实现自己嘅目标，我相信10岁嘅贺兰特知道後一定好兴奋！」