周五(6日)凌晨欧霸盃B组，英超劲旅白礼顿喺落後2球劣势下，绝地反击作客2比2逼和马赛，拎到球会史上欧洲赛事第1分。白礼顿喺被视为「死亡之组」嘅B组排包尾，不过同榜首亦只系相差3分，仍然保住出线希望。

白礼顿历史性出战欧洲赛，今仗作客由加度素带领嘅马赛，上半场表现失魂，喺19分钟同20分钟嘅90秒内连失2球。白礼顿换边後醒觉，54分钟三苫薫助攻柏斯高哥斯追番1粒，完场前2分钟再博到12码，由祖奥柏度操刀追成2比2，逃过分组赛2连败厄运，呢1分亦系白礼顿史上欧战第1分。

B组另一场，AEK雅典主场1比1和阿积士，AEK雅典2战4分排榜首，阿积士同马赛都有2分，而白礼顿就1分垫底。白礼顿领队迪萨比赛後表示：「我哋踢得唔好，展示唔到球队嘅实力，同足球有时系踢决心、激情，我为球员感到骄傲，佢哋落後2球嘅反应冇得顶。」