周五(6日)凌晨欧霸盃E组赛事，英超劲旅利物浦主场2比0赢圣基莱斯联，不过「红军」球员今仗表现漫不经心，前锋达云纽尼斯更上演门前6码「世纪失机」，成为网民笑柄，而佢亦喺半场被换走。利物浦正选前锋加普养伤下，达云纽尼斯将会喺未来一段日子担正，但名宿奥云同麦马拿文都表示怀疑。

利物浦今场正选作出9个变动，锋线由穆罕默德沙拿、达云纽尼斯同迪亚高祖达挂帅，战况一如所料控制大局，达云纽尼斯早段曾入波被判诈胡，17分钟更出现尴尬一幕，穆罕默德沙拿右路传中，达云纽尼斯6码点对住空门竟然射喺柱边出界，领队高普都摊大双手表现难以置信，统计显示呢个位置射门嘅xG(预期入球)系0.81，即系81%人喺呢个位都会射入，何况当时系空龙！

利物浦控制晒战局，但入波都要靠对方送礼，完半场前阿历山大阿诺特远射，圣基莱斯联门将扑波甩手，被赖恩格云贝治「执鸡」射入。半场期间达云纽尼斯同穆罕默德沙拿都被换走，利物浦要到92分钟先再由达亚高祖达入波锁定2比0胜局，喺E组2战全胜排榜首。

由於荷兰前锋加普受伤，据报要抖「几个星期」，意味今季英超只踢过2次正选嘅达云纽尼斯将会担正，不过名宿奥云就质疑：「(今次失机)一系信心不足、一系能力有问题或者唔集中，理论上职业球员一定会射入，佢嘅失机已经唔令人惊讶。纽尼斯有时有好好表现，有时就踢到好离谱，佢系块未打磨嘅宝石，仲需要好多教导。」

另一名宿麦马拿文亦附和奥云：「呢球失机好肉酸，个波已经任佢点射都入，作为前锋，纽尼斯梗系想喺今场入1、2球嚟整靓个入球数字，但今季都唔会出现更易食嘅机会。」高普赛後未有怪责达云纽尼斯，解释半场换走佢系「预先安排」嘅换人，并唔系对佢失机嘅惩罚。