利物浦名宿科拿今年6月成为沙特阿拉伯第二级别联赛球队艾卡迪沙嘅教练，成绩相当不俗，开季8场联赛取得6胜2和排第2位，但会方仍然唔满意，宣布同呢位48岁英格兰少帅解约，并聘请皇马名宿米高接手领军。

科拿2011年开始教波生涯之後，都喺亚太区搵食，包括教过泰国球队蒙通联、澳职球队布里斯班狮吼、印度球队东宾高，今年6月成为艾卡迪沙主帅，今季联赛8战取得6胜2和，成为唯一不败之师，仅少过榜首艾奥巴1分，升班机会乐观，并比上季仅排11位有巨大进步。不过，艾卡迪沙仍然决定换帅，令人费解，似乎嫌排第2位仍然唔够好。

至於60岁新帅米高曾经执教西维尔、马赛、基达菲、奥林比亚高斯等球队，教波资历比科拿深厚，但艾卡迪沙要求咁高，恐怕佢都未必做得耐。