车路士周六(28日)英超主场输畀宾福特，塞内加尔前锋尼高拉斯积逊表现差劲，比赛期间有车路士球迷竟然向佢作出挑衅，唔单止呢位前锋不满，连领队普捷天奴都忍唔住扯火，叫嗰位搞事球迷收声，专心支持球队。

车路士上半场占尽优势但入唔到波，完半场前尼高拉斯积逊走到场边听普捷天奴指示，突然有车迷挑衅：「醒下啦！点解你唔识入波？」尼高拉斯积逊听到即刻扯火，向佢做出「收声」手势还击，普捷天奴亦大喝：「支持球队！」并示意球迷坐低。

普捷天奴赛後仍怒气未消：「当时积逊走嚟同我倾位置问题，有个球迷就开始搞事，我唔想话系挑衅，但的确造成滋扰，积逊当时亦受到影响而分心。」车路士最终喺下半场连失2球输波，尼高拉斯积逊今季7场联赛入2球，但同时错失唔少黄金机会，令球迷失望。