今晚另一场早少少开波嘅英超快车，韦斯咸主场火并般尼茅夫。「锤仔帮」虽然啱啱借得曼城中场加云菲腊斯，但有多名主力伤停或踢太公波而缺阵，影响唔细，般茅一向有前冇後，今仗随时合演入球骚，捧2.5球大盘更上算。

（Now 622周五凌晨3时30分直播）

查实韦斯咸状态麻麻，各项赛事近4场只得3和1负未赢过，包括喺英足盃畀布里斯托城踢出局，令人失望。「锤仔帮」主帅莫耶斯日前终於获得心头好，借到曼城中场加云菲腊斯，不过佢久疏战阵唔慌有态，而且主力卢卡斯柏基达养紧伤，另外摩洛哥虽然喺非国盃刚刚出局，但阿古特亦未必赶及上阵，韦斯咸上场联赛两度领先下被锡菲联逼和2比2，仲有右闸华迪美高法尔被逐要坐波监，「莫天才」自然头痛。

中下游分子般尼茅夫，自从上年11月中起重上正轨，各项赛事近11场取得8胜1和2负，两场败仗只系输畀热刺同利物浦，虽败不辱。主帅伊拉奥拿崇尚进攻，单计近7场就狂轰18粒，净系箭头苏兰基已经占咗6球，不过亦失番11粒，全开3球或以上，明显系有前冇後，打死罢就，加上佢哋仲要抢分护级，遇上转沉嘅「锤仔帮」必定火力全开，捧入球大最稳阵。